லக்ஷ்மி சாந்த வடிவினள் என்பார்கள். ஆனால் ரவுத்திர ரூபமாக இருந்து, அமைதிபெற்ற தேவியாக இங்கு விளங்குகிறாள். வியாழக்கிழமைகளில் ஸ்ரீமகாலக்ஷ்மி தேவியை தரிசிக்க ஆயிரக்கணக்கில் பக்தர்கள் கூடுகின்றனர். இந்த ஊர் மக்கள், வீட்டின் ஒவ்வொரு விசேஷத்துக்கும் ஆதிலக்ஷ்மியின் அனுக்ரஹத்தைத்தான் முதலில் வேண்டுகிறார்கள். வலது கையில் தாமரையுடன் இடது கை முழக்கை வரை மட்டுமே உள்ளது. சர்வாலங்கார பூஷிதையாக முகத்தில் தேஜஸுடன் கனிவுடன் திகழ்கிறாள் ஆதிலக்ஷ்மி தேவி. தங்க கலசத்தில் கண்கள் திறந்து காணப்படுகின்றன! நமது ஊரில் அர்ச்சாவதாரம் சேதப்பட்டால் தகுந்த பூஜைகளும் பரிகாரங்களும் செய்து சிலையை மாற்றி விடுவார்கள்! இங்கு இந்த பின்னத்துடன் இருந்து தேவி சிறப்பு பெறுகிறாள்!

ராஜராஜேஸ்வரி மற்றும் அஷ்டலெக்ஷ்மி உருவங்களும் பிரதிஷ்டை செய்யப்பட்டு உள்ளன! அருகிலேயே தேவி வெளிப்பட்ட கிணறும் உள்ளது. அதற்கும் பூஜைகள் நடைபெறுகின்றன. சபரிமலைக்கு மாலை போடுவது போல் மார்கழி மாதத்தில் மாலை தீட்சை பெற்றுக்கொண்டு, 40 நாட்கள் அல்லது 48 நாட்கள் விரதம் கடைபிடிக்கிறார்கள். பச்சை ஆடை உடுத்தி, பச்சை மணிமாலை அல்லது துளசி மணிமாலை அணிந்து, விரதம் இருந்து கடைசி நாள் பஞ்சாமிர்த அபிஷேகம், குங்கும அபிஷேகம் செய்வித்து சிறப்பு பூஜைகள் செய்கிறார்கள். அந்த சமயத்தில் தினமும் ஒரு லட்சம் மக்கள் தேவியை தரிசனம் செய்வதாக சொல்கிறார்கள்.

இங்கு தேவி கோபமிக்க சக்தி ஸ்வரூபமாக, இங்குள்ள ஒரு கிணற்றில் பல யுகங்களாக மறைந்து இருந்தாளாம். கலியுக ஆரம்பத்தில், ஓர் அந்தணர் மோட்சம் தேடி இந்த வழியாக காசிக்குச் சென்று கொண்டிருந்தார். வழியில், ஒரு கிணறு! அதன் உள்ளிருந்து ஒரு பெண் குரல்! என்னை வெளியில் எடுத்து கோயில் அமைப்பாயாக! என்று சிம்ம கர்ஜனையுடன் கூறியது. கிணற்றை எட்டிப்பார்த்த அந்தணர் திடுக்கிட்டார். மிகவும் அழகான தெய்வாம்சம் பொருந்திய உருவம்! ஆனால் கண்களில் கனல்! தாயே! என்னை மன்னித்துவிடு. நான் காசியை நோக்கி செல்கிறேன். முக்தி தேடிச் செல்லும் என்னிடம் கோயில் அமைக்க உடல் வலிமை இல்லை. பொருள் வசதியும் இல்லை. என்று வேண்டிக் கொண்டு நடக்க ஆரம்பித்தார்.

ஆத்திரமடைந்த தேவி, கோடரி போன்ற ஆயுதத்தை இடது கையில் எடுத்தாள். சாதுவை நோக்கிக் குறி வைத்தாள். இதை உணர்ந்த கயிலை நாதனான சிவபிரான், தேவியின் இடது கையைத் துண்டித்தார். அம்பிகையை, சினம் தணித்து சாந்த ரூபமாக மாறும்படி பணிந்தார்! சங்கரனின் ஆணைக்குக் கட்டுப்பட்டு கருணை வடிவாக உருமாறினாள் மஹாலக்ஷ்மி! அங்கேயே அந்த முதியவருக்கு மோட்சமும் அருளினாள் என்கிறது தலபுராணம்.