மூலவர் சென்னகேசவர்: சென்னகேசவரின் நெற்றியில் ஸ்ரீசூர்ணம் செந்நிறத்தில் காட்சி தருகிறது. நின்றகோலத்தில் பெருமாள் சேவை சாதிக்கிறார். முகத்தில் பெண்மையின் எழிலும், கண்களில் அருளும் இழையோடுகிறது. மூக்குத்தி அணிந்திருக்கிறார். பாதத்தில் சதங்கையும், கொலுசும் அழகு செய்கின்றன. சங்கு, சக்கரம் இரண்டையும் மேல் இரு கைகள் தாங்கி நிற்கின்றன. வலக்கரத்தில் திருமகள்போல தாமரை மலரைத் தாங்குகிறார். இடக்கரம் கதாயுதத்தை தாங்கி நிற்கிறது. பெரிய பீடத்தின் மேல் 6 அடி உயரத்தில் இப்பெருமாளின் திருவுருவம் விளங்குகிறது. கேசவன் என்றால் தடைகளை நீக்குபவன் என்று பொருள். இக்கோயில் கோபுர கலசத்தைக் காண்பதால் சாபவிமோசனமும், சென்ன கேசவரின் பாதத்தைத் தரிசிப்பதால் பாவ விமோசனமும் உண்டாகும் என்பதை சிகர தரிசனம் சாபவிமோசனம், பாததரிசனம் பாவவிமோசனம் என்று குறிப்பிடுகின்றனர். கோபுரத்தைத் தாண்டிச் செல்லும்போது, கருடாழ்வார் சிறகை விரித்தபடி மூலவர் சன்னதியின் முன் திறந்த வெளியில் நின்றகோலத்தில் சேவை சாதிக்கிறார்.

நவரங்க மண்டபம்: மூலவரின் சந்நிதி முன் இருக்கும் நவரங்க மண்டபத்தை அந்தராளம் சுதநாசி என்கின்றனர். இங்கிருக்கும் தூண்களின் வேலைப்பாட்டினைச் சொல்வதற்கு வார்த்தைகள் இல்லை. நாட்டியப்பெண் தன் முடியைப் பின்னலிட்டு, ஆடை ஆபரணம் புனைவதும், கண்ணாடி பார்த்து திலகமிடுவதும், ஆடைதிருத்தி நடனத்திற்கு ஆயத்தமாவதுமாக பல சிலைகள் உள்ளன. மன்னன் விஷ்ணுவர்த்தனனின் மனைவி சாந்தளாதேவி நாட்டியம், இசையில் மிகுந்த ஈடுபாடு கொண்டவள் என்பதால் இம்மண்டபத்தை அமைத்ததாகக் கூறுகின்றனர்.

அனைவரும் சமம்: ஆயிரம் ஆண்டுகளுக்கு முன்பு ராமானுஜர் இங்கு வந்தார். அனைத்து ஜாதிமக்களும் சென்னகேசவரை வணங்க ஏற்பாடு செய்தார். இப்பகுதி மக்கள் இவரை குலதெய்வமாக வழிபட்டு வருகின்றனர்.   தினமும் மதியம் அன்னதானம் நடைபெறுகிறது.