மகம்: எச்சரிக்கை அவசியம்

கேது பகவானை நட்சத்திர நாதனாகவும் சூரியனை ராசி நாதனாகவும் கொண்ட உங்களுக்கு இதுவரை 9 ம் வீட்டில் சஞ்சரித்த ராகு காரிய தடையையும், எதிரிகளால் இடையூறையும், மற்றவர்களுக்கு கட்டுப்பட்டு செயல்படும் நிலையையும் உண்டாக்கி வந்தார். 3ம் வீட்டில் சஞ்சரித்த கேது உங்கள் நிலையில் முன்னேற்றத்தையும், வாழ்க்கையில் வளத்தையும், செயலில் வெற்றியையும், பொருளாதாரத்தில் உயர்வையும், துணிச்சலையும் உண்டாக்கி வந்தார். பொதுவாக சர்ப்ப கிரகங்கள் இருவரும் ஒரே நேரத்தில் ஒருவருக்கு நன்மை செய்வதில்லை. ஆனால் ஒரே நேரத்தில் இருவரும் ஒருவருக்கு பாதகமான பலன்களைத் தருவர்.

இந்த நிலையில் அக்.8, 2023 அன்று உங்கள் ராசிக்கு அஷ்டம ஸ்தானமான 8 ல் சஞ்சரிக்கும் ராகுவும், 2 ம் இடமான குடும்ப ஸ்தானத்தில் சஞ்சரிக்கும் கேதுவும் உங்களுக்கு எத்தகைய பலன்களை வழங்கிட உள்ளனர்?

அஷ்டம ஸ்தானத்தில் ராகு சஞ்சரிக்கும் போது உடலில் சங்கடத்தை உண்டாக்குவார், உறவுகளிடம் விரிசலை ஏற்படுத்துவார். இனம் புரியாத குழப்பம் இருந்து கொண்டே இருக்கும். வசதி வாய்ப்பில் குறைவு ஏற்படும். சிலருக்கு மறைமுக நோயால் சங்கடம் ஏற்படும். விஷக்கடி, மருத்துவர் பரிந்துரை இல்லாமல் எடுக்கும் மருந்துகளால் பாதிப்பு உண்டாகும், கணவன், மனைவி உறவில் கருத்து வேறுபாடு ஏற்படும், எதிர்பாலினரிடம் இக்காலத்தில் கவனமாக இருப்பது அவசியம். குடும்ப ஸ்தானத்தில் கேது சஞ்சரிக்கும் போது, பணத்தேவைக்காக அதிகமாக உழைக்க வேண்டியிருக்கும். குடும்பத்தில் தேவையற்ற சங்கடம் உண்டாகும், சிலர் குடும்பத்தை விட்டு பிரிந்து செல்ல நேரும். கொடுத்த வாக்கை காப்பாற்ற முடியாது. வார்த்தைகளால் பிரச்னை உண்டாகும்.

சனி சஞ்சாரம்: உங்கள் ராசிக்கு 8ம் இடத்தில் ராகு, 2ம் இடத்தில் கேது சஞ்சரிக்கும் இக்காலத்தில், 6 ம் இடமான ருண ரோக சத்ரு ஸ்தானத்தில் அக்.23, 2023 வரை வக்கிர கதியில் சஞ்சரிப்பவர் அதன்பின் வக்கிர நிவர்த்தியாகி அங்கே 2 மாத காலம் ஆட்சியாக சஞ்சரிக்கிறார். இக்காலம் மிக யோகமான காலமாக இருக்கும். மீண்டும் டிச.20,2023 முதல் 7ம் இடத்தில் கண்டச்சனியாக சஞ்சரிக்கிறார் என்பதால் இக்காலத்தில் பல பிரச்னைகள், வீண் அலைச்சல், உடல்நிலையில் பாதிப்பு, குடும்பத்தினரிடம் இருந்து பிரிந்து வாழும் நிலை, இருக்கும் இடத்தை விட்டு வேறிடத்திற்கு செல்ல வேண்டிய கட்டாயம், எதிர்பாலினரால் பாதிப்பை ஏற்படுத்துவார்.

குரு சஞ்சாரம்: ஏப்.30, 2024 வரை பாக்கிய ஸ்தானத்தில் சஞ்சரித்து அதிர்ஷ்டத்தை வழங்கி, சமூகத்தில் நீங்கள் எதிர்பார்த்த அந்தஸ்தை வழங்குவார். அக்.8, 2023 முதல் டிச.20, 2003 வரை அவர் வக்கிரமடையும் காலத்தில் இப்பலன்கள் மாறுபடும். மே1,2024 முதல் 10ம் வீடான ஜீவன ஸ்தானத்தில் சஞ்சரிக்கிறார் என்பதால் அதன்பின் சங்கடங்கள் அதிகரிக்கும். நெருக்கடி கூடும். சோதனைகளுக்கு ஆட்பட்டு அவதிக்குள்ளாக நேரிடும். ஒரு பக்கம் பணம் நெருக்கடி, மறுபக்கம் தொழிலில் முடக்கம், நஷ்டம், பிரச்னை, பணியில் நெருக்கடிகள், அதனால் குடும்பத்திலும், மனதிலும் சங்கடம் உண்டாகும்.

பொதுப்பலன்: ராகு கேது சஞ்சார நிலையுடன், டிச.20, 2023 முதல் சனியின் சஞ்சாரமும், மே1, 2024 முதல் குருவின் சஞ்சாரமும் சாதகமாக இல்லாத காரணத்தால் பணிபுரியும் இடங்களில் சங்கடங்கள் உண்டாகும். தொழிலில் தடை, முயற்சியில் பயனற்ற நிலை ஏற்படும். செல்வாக்கில் பின்னடைவும், மனதில் குழப்பமும் உண்டாகும், மற்றவரை பகைத்துக் கொள்ளாமல் சாதுர்யமாக செயல்பட்டால் சங்கடங்களில் இருந்து விடுபடலாம், உடல் நிலையில் அவ்வப்போது ஏதேனும் சங்கடம் தலைகாட்டும். புதிய முயற்சிகள் இக்காலத்தில் இழுபறியாகும்.

தொழில்: கம்ப்யூட்டர், மின்சாதனங்கள், ஆட்டோ மொபைல்ஸ், இன்டஸ்ட்ரீஸ், திரைப்படம், தொலைக்காட்சி, யூ டியூப் போன்ற தொழில்களில் ஈடுபட்டிருப்போரும் பணிபுரிவோரும் நெருக்கடிக்கு ஆளாவீர்கள்.

பணியாளர்கள்: பணிபுரியும் இடத்தில் நெருக்கடிக்கு ஆளாவீர்கள், உழைப்பில் கவனம் செலுத்த முடியாத அளவிற்கு இடையூறுகள் ஏற்படும், எதிர்பார்ப்பு இழுபறியாகும், தனியார் நிறுவனங்களில் பணிபுரிவோர் வேலையில் கவனமாக இருக்க வேண்டும்.

பெண்கள்: நினைத்ததை நிறைவேற்றிக் கொள்வீர்கள். பொன் பொருள் சேர்க்கை உண்டாகும். திருமண வயதினருக்கு திருமணம் நடந்தேறும். குழந்தை பாக்கியத்திற்காக ஏங்கியவர்களின் கனவு நிறைவேறும். உடல்நிலையில் ஒன்று விட்டு ஒன்று என்று ஏதேனும் தொல்லை உண்டாகிக் கொண்டே இருக்கும். மே1, 2024 முதல் இந்த நிலையில் மாற்றம் உண்டாகும். பொருளாதார நெருக்கடிகளும் சங்கடமும் எதிர்பாலினரால் தொல்லையும் அதிகரிக்கும்.

கல்வி: வாக்கு ஸ்தானத்தில் கேது சஞ்சரிப்பதும், 4ம் இடத்தின் மீது டிச.20, 2023 முதல் சனியின் பார்வை பதிவதும் கல்வி மீதான அக்கறையில் சங்கடத்தை ஏற்படுத்தும். ஆசிரியர்களின் அறிவுரையை ஏற்று செயல்படுவதுடன், முழு கவனத்தையும் படிப்பில் செலுத்துவது ஒன்றே உங்களை உயர்த்தும்.

உடல்நிலை: ஆயுள் ஸ்தானமான 8ல் ராகு சஞ்சரிப்பதும், டிச.20, 2023 முதல் கண்டச்சனி வருவதும் நல்லதல்ல, இக்காலத்தில் பணிபுரியும் இடம், வாகனத்தை இயக்குவது, விஷ ஜந்துக்கள், மருந்து மாத்திரைகள் என அனைத்திலும் எச்சரிக்கை தேவை.

குடும்பம்: குடும்ப ஸ்தானத்தில் கேது சஞ்சரிப்பதால் அனுசரித்துச் செல்வதால் நண்மையுண்டாகும், பிள்ளைகள், பெரியோரால் அவ்வப்போது ஏதேனும் பிரச்னை உண்டாகும். பொருளாதார நெருக்கடியால் சங்கடம் அதிகரிக்கும். தேவைகளை நிறைவேற்றிக் கொள்ள முடியாமல் போகும். மே1, 2024 முதல் குடும்ப ஸ்தானத்திற்கு குருவின் பார்வை உண்டாவதால் சங்கடம் விலகி சுபிட்சமான நிலை உண்டாகும்.