சுமார் ஆறுபது வருடங்கள் சபரிமலைக்கு விரதமிருந்து ஐயப்பனைத் தரிசித்து வந்த கேசவ பணிக்கர் என்பவர், தள்ளாமையால் மலைக்குச் செல்ல முடியாத நிலை ஏற்பட... மனம் நொந்து போனார் அவர். ஒருகட்டத்தில் ஐயப்பனுக்கு புதுக்கோட்டையில் ஓர் ஆலயம் கட்டினால் என்ன எனும் முடிவுக்கு வந்தார். தன்னைப் போலவே ஐயப்பனின் மீது அளவற்ற பக்தி கொண்டிருந்த டாக்டர் சண்முகசுந்தரத்திடம் இதைத் தெரிவிக்க... அவரும் மனநிறைவுடன் சம்மதித்தார். புதுக்கோட்டை நகரில் அற்புதமாக உருவானது ஐயப்பன் கோயில்.

ஆரம்பத்தில், ஐயப்பனின் விக்கிரகம் மட்டுமே பிரதிஷ்டை செய்யப்பட்டு வழிபட்டார்களாம். பிறகு சந்நியாசி ஒருவர் இங்கே வந்து, இந்தத் தலத்தில் தம்பதி சமேதராக சாஸ்தா குடியிருந்தால், இன்னும் சுபிட்சம் பெருகும் என்று சொல்லிச் செல்ல... அதன்படி பூர்ணை புஷ்கலை சமேதராக தர்மசாஸ்தாவின் விக்கிரகம் பிரதிஷ்டை செய்யப்பட்டது.